Movember është një lëvizje ndërkombëtare që mbahet çdo vit gjatë muajit nëntor, e që ka për qëllim rritjen e ndërgjegjësimit për problemet shëndetësore të burrave, përfshirë këtu kancerin e prostatës, kancerin e testikujve, shëndetin mendor dhe parandalimin e vetëvrasjeve. Emri Movember është një kombinim i fjalëve angleze moustache (mustaqe) dhe November (nëntor), ndërsa rritja e mustaqeve është një simbol karakteristik i fushatës. Kjo lëvizje jo vetëm që e promovon shëndetin, por krijon edhe një komunitet global që i inkurajon burrat të flasin për problemet e tyre dhe të ndërmarrin një qasje proaktive ndaj mirëqenies së tyre fizike dhe mendore.

Origjina dhe zhvillimi i Movember

Movember filloi në vitin 2003 në Melbourne të Australisë, kur një grup miqsh të njohur si "30 Origjinalët", vendosën të rrisnin mustaqet në muajin nëntor për të rritur ndërgjegjësimin për shëndetin e burrave. Ideja ishte e thjeshtë, por e fuqishme: mustaqet u bënë një stimul vizual për biseda rreth temave që shpesh anashkalohen. Nga fillimet modeste Movember u rrit në një iniciativë globale e mbështetur nga miliona pjesëmarrës në më shumë se 20 vende, përfshirë këtu Shtetet e Bashkuara, Kanadanë, Mbretërinë e Bashkuar, Australinë, Maqedoninë dhe shumë vende evropiane. Lëvizja organizohet nga Fondacioni Movember, një organizatë jofitimprurëse që financon programe hulumtuese dhe mbështetëse për shëndetin e burrave. Sot, Movember është shumë më shumë sesa një fushatë për rritjen e mustaqeve. Është një platformë që i bashkon komunitetet, mbledh fonde për hulumtime dhe promovon ndryshime në mënyrën se si shoqëria e sheh shëndetin e burrave. Përmes ngjarjeve, mbledhjes së fondeve dhe fushatave edukative, Movember ka mbledhur qindra miliona dollarë që janë investuar në mbi 1.250 projekte për shëndetin e burrave në të gjithë botën.

Qëllimet kryesore të Movember

Movember fokusohet në tre fusha kryesore të shëndetit të meshkujve:

1. Kanceri i prostatës: Kanceri i prostatës është një nga llojet më të shpeshta të kancerit tek burrat, sidomos tek ata mbi 50 vjet. Movember promovon kontrolle të rregullta dhe edukim rreth zbulimit të hershëm, të cilat mund të rrisin ndjeshëm mundësinë për trajtim të suksesshëm.
2. Kanceri i testikujve: Edhe pse është një formë më e rrallë e kancerit, ky lloj kanceri i prek kryesisht burrat e rinj (të moshës nga 15 deri në 35 vjet). Movember i inkurajon burrat të jenë të vetëdijshëm për simptomat dhe të kryejnë vetë-kontrolle të rregullta.
3. Shëndeti mendor dhe parandalimi i vetëvrasjeve: Burrat përballen me një rrezik më të lartë nga vetëvrasjet sesa gratë, ndërsa shumë prej tyre evitojnë të kërkojnë ndihmë për shkak të stigmës. Movember punon për t’i normalizuar bisedat rreth shëndetit mendor dhe ofron burime për mbështetje.

Krahas këtyre qëllimeve Movember ka për qëllim t’i ndryshojë normat shoqërore që i pengojnë burrat të flasin për problemet e tyre. Fushata i inkurajon burrat të jenë të hapur, të kërkojnë mbështetje dhe të bëjnë jetë më të shëndetshme.

Pse është i rëndësishëm Movember?

Movember ka pasur një ndikim të thellë në shëndetin e burrave dhe në shoqëri në përgjithësi. Ja disa arsye pse kjo lëvizje është kaq e rëndësishme:

1. Rritja e ndërgjegjësimit për çështjet shëndetësore

Burrat shpesh i shmangin kontrollet mjekësore ose nuk flasin për problemet e tyre shëndetësore për shkak të pritshmërive kulturore se ata duhet të jenë "të fortë" dhe "të pavarur". Kjo mund të çojë në diagnostikim të vonë të sëmundjeve serioze, si kanceri i prostatës ose i testikujve. Movember përdor simbolikën e mustaqeve për të inkurajuar biseda dhe për ta thyer stigmën që i rrethon këto tema. Përmes fushatave burrat edukohen për rëndësinë e kontrolleve të rregullta dhe masave preventive.

2. Lufta kundër stigmës për shëndetin mendor

Shëndeti mendor është një nga fushat më të rëndësishme, por edhe më të neglizhuara, të shëndetit të burrave. Sipas statistikave burrat kanë tre deri në katër herë më shumë gjasa të kryejnë vetëvrasje sesa gratë. Movember punon për të krijuar një hapësirë ​​të sigurt ku burrat mund të flasin për emocionet e tyre, të kërkojnë ndihmë dhe të përballen me sfida si depresioni dhe ankthi. Programet si Move for Movember i inkurajojnë burrat të jenë fizikisht aktivë, gjë që gjithashtu ka një ndikim pozitiv në shëndetin mendor.

3. Financimi i hulumtimeve dhe i programeve

Fondet e mbledhura përmes Movember investohen për hulumtimin e kancerit të prostatës dhe testikujve, si dhe në programet për mbështetjen e shëndetit mendor. Për shembull, Fondacioni Movember ka financuar projekte për zhvillimin e metodave të reja të diagnostikimit dhe trajtimit, si dhe iniciativa për përmirësimin e qasjes në mbështetje psikologjike për burrat.

4. Krijimi i komunitetit dhe solidariteti

Movember krijon një ndjenjë komuniteti, ku burrat dhe gratë bashkohen për të mbështetur një kauzë të rëndësishme. Pjesëmarrja në fushatë, qoftë duke rritur mustaqet, duke organizuar një aktivitet apo duke dhuruar, i bashkon njerëzit dhe krijon energji pozitive. Ky solidaritet është çelësi për të nxitur ndryshime në shoqëri.

5. Promovimi i një mënyre të shëndetshme të jetesës

Movember i inkurajon burrat të bëjnë jetë më të shëndetshme, me aktivitet të rregullt fizik, të ushqehen shëndetshëm dhe të kujdesen për shëndetin mendor. Eventet si “Move for Movember” i motivojnë pjesëmarrësit të vrapojnë, të ecin ose të angazhohen në aktivitete të tjera fizike, të cilat kanë ndikim pozitiv në shëndetin e përgjithshëm.

Si funksionon Movember?

Movember është unik në thjeshtësinë dhe kreativitetin e tij. Ja disa mënyra se si funksionon fushata:

• Rritja e mustaqeve: Burrat inkurajohen të rrisin mustaqe në fillim të nëntorit dhe t'i mbajnë ato gjatë gjithë muajit. Kjo vepron si një "start për biseda", duke inkurajuar diskutime rreth shëndetit të burrave.
• Mbledhja e donacioneve: Pjesëmarrësit mund të krijojnë një profil në uebfaqen e Movember dhe të mbledhin donacione nga miqtë, familja dhe kolegët.
• Evente dhe aktivitete: Për të tërhequr vëmendjen ndaj kauzës organizohen evente lokale dhe globale, si gara, festa dhe punëtori edukative.
• Edukim: Movember ofron burime dhe informacion rreth shëndetit të burrave, përfshirë këtu këshilla për parandalimin, vetë-kontrollet dhe përballimin e sfidave mendore.

Si të inkuadroheni në Movember?

Pjesëmarrja në Movember është e lehtë dhe mund të bëjë një ndryshim të madh. Ja disa mënyra për se si mund të inkuadroheni:

1. Lëshoni mustaqe: Filloni nëntorin me një fytyrë të rruar dhe rrisni mustaqet. Ndani historinë tuaj në rrjetet sociale me hashtagun #Movember për t’i frymëzuar të tjerët.
2. Inkuadrohuni në „Move for Movember“: Vendosni qëllim vetes për të qenë fizikisht aktiv, për shembull, të ecni ose vraponi 60 kilometra gjatë muajit (në nder të 60 burrave që humbasin jetën si pasojë e vetëvrasjes në çdo orë).
3. Dhuroni ose mblidhni fonde: Regjistrohuni në movember.com dhe mbledhni donacione për t’i mbështetur programet e fondacionit.
4. Edukohuni dhe edukoni të tjerët: Informohu për shëndetin e burrave dhe ndaje informacionin me familjen, miqtë dhe kolegët e tu.
5. Ogranizoni evente: Organizoni një event lokal, festë ose aktivitet sportiv, për ta mbështetur kauzën.

Ndikimi i Movember

Që nga fillimi i saj Lëvizja Movember ka bërë një ndryshim të rëndësishëm në shëndetin e burrave. Disa nga arritjet e saj kryesore përfshijnë:

• Financimin e mbi 1.250 projekteve për shëndetin e burrave, si hulumtime për trajtime dhe diagnostikime të reja.

• Rritjen e ndërgjegjësimit për rëndësinë e zbulimit të hershëm të kancerit, i cili ka shpëtuar jetën e një numri të madh të burrave.

• Krijimin e programeve për mbështjetje për shëndetin mendor, si iniciativa për trajnimin e burrave që të flasin për emocionet e tyre.

• Ndërtimin e një komuniteti global që lidh burrat dhe gratë në luftën për një shëndet më të mirë.

Movember është shumë më shumë sesa një fushatë për rritjen e mustaqeve – është një lëvizje që shpëton jetë, që thyen stigmat dhe krijon ndryshime pozitive në shoqëri. Duke marrë pjesë në Movember secili nga ne mund të kontribuojë në përmirësimin e shëndetit të burrave, qoftë duke rritur mustaqe, duke mbledhur fonde apo thjesht duke përhapur ndërgjegjësim. Këtë nëntor bashkohuni me lëvizjen dhe bëhuni pjesë e ndryshimit që po e ndryshon botën për mirë.

Aktivitete të planifikuara të Institutit të Shëndetit Publik për ta shënuar "Movember".

Këtë vit Instituti i Shëndetit Publik planifikon ta shënojë këtë muaj me aktivitete të ndryshme në çdo javë të nëntorit. Konkretisht, instituti do të ketë aktivitete që lidhen me një sferë të ndryshme të shëndetit të burrave çdo javë, me qëllim që të rrisë ndërgjegjësimin më gjerësisht për të gjitha problemet me të cilat përballen burrat gjatë gjithë jetës së tyre, e jo vetëm për të vënë theksin te kanceri i prostatës, siç ndodh zakonisht në botë. Pra, përveç sëmundjeve më të shpeshta që i prekin burrat, do të flasim edhe për shëndetin mendor të burrave, aktivitetin fizik, ushqyerjen e shëndetshme dhe presionin që ushtrohet nga shoqëria mbi burrat.

Përgatiti: Departamenti i promovimit të shëndetit dhe i ndjekjes së sëmundjeve